Crime Entertainment Sports Politics opinion pravasam Media Education Agriculture Lifestyle Travel Health Religion Business Obituary Literature art & culture



ദിലീപിന് അഭിനയിക്കാമെങ്കിൽ ശ്രീറാമിന് എന്തുകൊണ്ട് കലക്ടറായി ജോലി ചെയ്തുകൂടാ; ചോദ്യവുമായി കെ സുരേന്ദ്രൻ

janmabhumi-ad

Digital Malayali Web Desk August 08, 2022, 01:29 a.m.

ദിലീപിനെതിരേ കേസുണ്ട്. പക്ഷേ, ദിലീപ് ഒരു സിനിമയിലും അഭിനയിക്കരുതെന്ന് പറയാന്‍ സാധിക്കുമോ?


കൊല്ലം∙ ആലപ്പുഴ കലക്ടർ സ്ഥാനത്തുനിന്നു ശ്രീറാം വെങ്കിട്ടരാമനെ മാറ്റിയതിൽ വിമർശനവുമായി ബിജെപി സംസ്ഥാന അധ്യക്ഷൻ കെ.സുരേന്ദ്രൻ. നടിയെ ആക്രമിച്ച കേസിലെ പ്രതിയായ നടൻ ദിലീപിനെ സിനിമയിൽ അഭിനയിപ്പിക്കാമെങ്കിൽ മദ്യപിച്ച് വാഹനമോടിച്ച് മാധ്യമപ്രവർത്തകനെ കൊലപ്പെടുത്തിയ കേസിൽ പ്രതിയായ ശ്രീറാം വെങ്കിട്ടരാമന് കലക്ടറായി ജോലി ചെയ്യാമെന്ന് സുരേന്ദ്രൻ പറഞ്ഞു. കൊല്ലത്തു നടത്തിയ വാർത്താസമ്മേളനത്തിൽ മാധ്യമപ്രവർത്തകരുടെ ചോദ്യത്തിനാണ് സുരേന്ദ്രന്റെ പ്രസ്താവന.

ശ്രീറാം വെങ്കിട്ടരാമന്‍ ഒരു കേസില്‍ പ്രതിയാണ്. അദ്ദേഹത്തെ ശിക്ഷിച്ചിട്ടില്ല. അദ്ദേഹത്തിനെതിരേ സര്‍വീസ് നടപടിയെടുത്തു. പിന്നീട് തിരിച്ചെടുത്തു. പിന്നെ അദ്ദേഹത്തിന് ജോലിചെയ്യാന്‍ പാടില്ലെന്ന് പറയുന്നത് എന്ത് നടപടിയാണ്? ആരാണ് അത് തീരുമാനിക്കുന്നത്? കേസ് അന്വേഷിക്കേണ്ടത് സംസ്ഥാന സര്‍ക്കാരാണ്. അല്ലാതെ മതസംഘടനകളല്ല ഒരാള്‍ കുറ്റക്കാരനാണോ എന്ന് തീരുമാനിക്കേണ്ടത്.

ദിലീപിനെതിരേ കേസുണ്ട്. പക്ഷേ, ദിലീപ് ഒരു സിനിമയിലും അഭിനയിക്കരുതെന്ന് പറയാന്‍ സാധിക്കുമോ? ദിലീപിനെതിരായ കേസ് ശരിയായ നിലയില്‍ അന്വേഷിച്ച് കുറ്റം ചെയ്തിട്ടുണ്ടെങ്കില്‍ ശിക്ഷിക്കണം. അതാണ് നിയതമായ മാര്‍ഗം. ഇവിടെ ശ്രീറാം വെങ്കിട്ടരാമന്‍ ഒരു ജില്ലയിലും കളക്ടറാകാന്‍ പാടില്ല എന്നാണ് പറയുന്നത്. സിപിഐക്കാര്‍ പറയുകയാണ് അയാളെ ഭക്ഷ്യസിവില്‍ സര്‍വീസിലും ആക്കാന്‍ പാടില്ല. അതെന്ത് ന്യായം? ഞങ്ങള്‍ക്ക് മനസിലാക്കാന്‍ പറ്റുന്നില്ല. അങ്ങനെയാണെങ്കില്‍ എന്ത് സംവിധാനമാണ് മുന്നോട്ട് പോകുക. ചില ആളുകള്‍ തീരുമാനിക്കുന്നതേ നടക്കുകയുള്ളൂ, അത് എങ്ങനെയാണ് ശരിയാകുന്നത്.

ശ്രീറാം വെങ്കിട്ടരാമന് വേണ്ടി ആരും വക്കാലത്ത് എടുക്കുന്നില്ല. നിരപരാധിയായ ഒരു മാധ്യമപ്രവര്‍ത്തകനാണ് കൊല്ലപ്പെട്ടത്. കേസ് തെളിയണം എന്നതാണ് ഞങ്ങളുടെ അഭിപ്രായം. കേസില്‍ പ്രതി ചേര്‍ക്കപ്പെട്ട ഒരാളെ സര്‍വീസില്‍ തിരിച്ചെടുത്തതിനു ശേഷം ഒരു പദവിയിലും ഇരിക്കാന്‍ ഞങ്ങള്‍ അനുവദിക്കില്ലെന്നാണ് പറയുന്നത്. ആരാണ് ഈ ഞങ്ങള്‍? പിന്നെ എന്തിനാണ് മുഖ്യമന്ത്രി ഒരു മാറ്റവും ഉണ്ടാകില്ലെന്ന് പറഞ്ഞത്. മതസംഘടനകളുടെ വെല്ലുവിളിക്ക് മുന്നില്‍ സര്‍ക്കാര്‍ മുട്ടുമടക്കുകയാണ്.

വഖഫ് ബോര്‍ഡ് നിയമനങ്ങള്‍ പി.എസ്.സിക്കു വിടണമെന്ന് ആരും ആവശ്യപ്പെട്ടിട്ടില്ല. വിപ്ലവകരമായ തീരുമാനമാണ്, നവോത്ഥാന നടപടിയാണ് എന്നുപറഞ്ഞാണ് തീരുമാനം കൊണ്ടുവന്നത്. എന്താണ് നവോത്ഥാന നായകന് ഇടയ്ക്കിടക്ക് കാലിടറുന്നത്? മതസംഘടനകളും വര്‍ഗീയ സംഘടനകളും സമൂഹത്തില്‍ അവരുടെ സംഘടിത താല്‍പര്യങ്ങള്‍ സംരക്ഷിക്കുകയാണ്. അതിന് സര്‍ക്കാര്‍ മുട്ടുമടക്കുകയാണ്. അതിനെ നവോത്ഥാന സര്‍ക്കാര്‍ എന്നല്ല പറയേണ്ടത്, നട്ടെല്ലില്ലാത്ത സര്‍ക്കാര്‍ എന്നാണെന്നും കെ. സുരേന്ദ്രന്‍ പറഞ്ഞു.

Latest Post

More news >>

JOIN THE DISCUSSION

ഇവിടെ കൊടുക്കുന്ന അഭിപ്രായങ്ങൾ ഡിജിറ്റൽ മലയാളിയുടേതല്ല. വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക്.

Related News

Editor's Pick